رباعيات من وحى ثوره يناير

قصيدة رباعيات (من وحي ثورة 25 يناير)

لازم يكون للشعب صوت
والرأي شيئ من حقّنا
حتى الشوارع والبيوت
رافضين سكوتنا وذّلنّا
والثورة لمّا بتتّولِدْ
بتكون بداية للبلدْ
والشعب بيكون المدد
علشان نطهّرْ أرضنا
&&&&&&&&&&&&&&&&&&
الثورة دي صوت الضميرْ
جوّة القلوب الطيّبةْ
من حقُّه يختار المصير
ويخوض بنفسه التجربةْ
والشعب.. بُركان انفجرْ
لمّا الفساد زاد وانتشّرْ
وامّا استجاب ليه القدرْ
كانت البداية مُرعِبة...
&&&&&&&&&&&&&&&&&&
الشعب قال كلمتُهْ والرأي ع المكشوفْ
هنموت ونحيا بشرف.. نِتحدّى أي ظروفْ
إحنا اللّي طول عُمرنَا..
صابرين بقالنا سنينْ..
والكلمة من حقّنَا....
بس اللي يسمع مينْ.؟؟
بُركان غضب وانفجر..ملعون أبوه الخوفْ..
&&&&&&&&&&&&&&&&&&&
خُدي كل نقطة دَمّ في وريدي..
خُدي نبض قلبي..واقبليني شهيد..
وخلّي يوم الثورة يوم عيدي..
وعيشي حُرّة...هتلاقيني سعيد..
لو شُوفتي فوق أرض الميدان دَمّي..
بيسيل عشانك...كَبّري وسَمّي..
وقولي للدينا بصوت عالي..
إبني..حبيبي...جاي يشيل هَمّي..
&&&&&&&&&&&&&&&&&&&&&&&&&&&&&&&&&
الثورة ثورة جيل...عازف على جروحنا
شاف العذاب والويل.....صّمّم يريّحنا
مهما الزمن بيميل...مهما يفيض الكيل..
هنشق قلب الليل...ونعود بأفراحنا...
&&&&&&&&&&&&&&&&&&&&&&&&&&&&&&&&&
الثورة ثورة عملْ.. مش بس بالهتافات..
نفرش طريقنا أملْ..نصبحْ عليه ونبات..
ياشعب فاق وانتفضْ..من سطوة البهوات..
كمّل طريقك بقا...وارتاح مِن الغُمّة...
&&&&&&&&&&&&&&&&&&&&&&&&&&&&&&&&
كلاب الحراسِة..وزارة وحكُومة
وناس بلطجيّة...بتحُكُم بشومة
كلاب الحِراسة(ياريس).. كلابك
بتنهش في شعبك..وتُحرُس جنابك
بتحُكُم بأمرك....وأمرك مُجاب..
ومين غير سيادتك بيحمي الكلاب؟؟
تِطبّل..تِهلّل.. وتهتف عشانكْ
وتحلم بعطفكْ..ونَظرة حنانكْ
وتاخد بإيدك..لوالشعب خانكْ
وتِحفظ كيانكْ..مابين الشبابْ
&&&&&&&&&&&&&&&&&&&&&&