خدتوا إيه؟ - الشاعر مصطفى النادي

من كتاب ( دموع الياسمين )
للشاعر / مصطفي النادي
-----------------------
خدتوا إيه ؟

خدتوا موقف ..
منا ليه ؟
حبيناكم
واديناكم من قلوبنا
حب دافى
وحس صافى
واحنا خدنا منكم ايه ؟
هو لو يوم اشتكينا
أو فرحنا أو بكينا
م اللى فيكم كان فى ريحنا ؟
أو بيزعل لو جرحنا ؟
غدركم دايما دابحنا
واحنا عشنا نحب فيكم
خفنا يا ما كتير عليكم
لو زعلتم بنراضيكم
ونداديكم
إيدنا ليكم مديناها
والقلوب ياما اديناها
وكونتوا دايما تجرحونا
وتحسدونا
وف قلوبنا عضيتونا
لو فى يوم بعّدنا عنكم
بتلومونا !
قلتوا يا ما كتير علينا
واحنا بنغمض عنينا
كتير صبرنا
كتير حاولنا واتحايلنا
يا ريت قدرنا
نغيّر النظره ف عنيكمْ
نزرع الحب ف واديكم
يطرح الورد ف إيدكم
كان أملنا
يا ريتنا نلنا
لكِين خسرنا
الغدر أصلا ..
طبع فيكم !!

الشاعــــــر / مصطفـــــــي النــــــــادي